Kürdəmirdə əhaliyə göstərilən ödənişli xidmətlər üzrə əsas göstəricilər

2024-cü ildə əhaliyə göstərilən ödənişli xidmətlərin dəyəri 2023-cü illə müqayisədə real ifadədə 4,4 faiz artaraq 103661,1 min manat olmuşdur.
Hüquqi şəxslər tərəfindən əhaliyə göstərilən ödənişli xidmətlərin həcmi ümumi yekunun 8,8 faizini təşkil etməklə əvvəlki ilə nisbətən 11,8 faiz azalaraq 9172,0 min manat olmuşdur. Hüquqi şəxs yaratmadan fəaliyyət göstərən fərdi sahibkarların əhaliyə göstərdiyi ödənişli xidmətlərin həcmi isə əvvəlki ilə nisbətən 6,3 faiz artaraq 94489,1 min manat təşkil etmişdir.
Əhaliyə göstərilən ödənişli xidmətlərin 6,9 faizi və ya 7116,0 min manatı dövlət, 93,1 faizi və ya 96545,1 min manatı qeyri-dövlət mülkiyyətinin payına düşür.
2024-cü il ərzində 9721,0 min manatlıq məişət xidməti göstərilmişdir ki, bu da əvvəlki ilə nisbətən 2,7 faiz artmışdır. Məişət xidməti ödənişli xidmətlərin ümumi həcminin 9,4 faizini təşkil etmişdir. Məişət xidmətinin həcminin 3,3 min manatı və ya 0,03 faizi hüquqi şəxslərin, 9717,7 min manatı və ya 99,97 faizi hüquqi şəxs yaratmadan fəaliyyət göstərən fərdi sahibkarlar hesabına formalaşmışdır. Bunun başlıca səbəblərindən biri məişət sahəsində fiziki şəxslərin fəaliyyətinin daha da inkişaf etməsidir.

Əhaliyə göstərilən ödənişli xidmətlər üzrə əsas göstəricilər 

2024-cü ildə hər bir rayon sakini orta hesabla 872,6 manatlıq və ya 2023-cü illə müqayisədə nominal ifadədə 77,8 manat çox müxtəlif ödənişli xidmətlərdən istifadə etmişdir.

Kürdəmir rayon Statistika İdarəsi