Sor-Sor kəndində səyyar qəbul keçirilib
Oktyabrın 10-da Kürdəmir rayon İcra Hakimiyyətinin Başçısı Ceyhun Cəfərovun rayonun Sor-Sor kəndində növbəti səyyar qəbul-görüşü keçirilib.
Sor-Sor kənd tam orta məktəbində keçirilən qəbulda rayon icra hakimiyyətinin məsul işçiləri, hüquq mühafizə orqanlarının, səhiyyə, təhsil, mədəniyyət, digər xidmət təşkilatlarının rəhbərləri,Muradxan kənd inzibati ərazi dairəsinə daxil olan Sor-Sor, Muradxan və Çöl-Ərəb kəndlərinin sakinləri iştirak ediblər.
Kürdəmir rayonunda görülmüş işlər barədə geniş məlumat verən rayon İcra Hakimiyyətinin Başçısı Ceyhun Cəfərov Muradxan kənd inzibati ərazi vahidliyində də xeyli abadlıq, quruculuq, təmir-bərpa işlərinin aparıldığını, bütün potensial imkanlar nəzərə alınmaqla bir çox layihələrin uğurla icra olunduğunu, sakinlər tərəfindən qaldırılan problemlərin həlli istiqamətində daim tədbirlərin görüldüyünü diqqətə çatdırdı. Rayon rəhbəri vurğulayıb ki, uzunluğu 34,5 km olan Pirili-Muradxan-Sor-Sor avtomobil yolunun tikintisi ilə kənd sakinlərinin gediş-gəlişi, yük və sərnişin daşınması daha da asanlaşacaq, ən əsası bölgədə kənd təsərrüfatının inkişafında geniş imkanlar yaradacaqdır.
Səyyar qəbulda iştirak edən kənd sakinləri çıxış edərək kəndə gələn su kanallarının təmizlənməsi, ünvanlı sosial yardımın verilməsi, təhsil məsələləri, örüş sahəsinin ayrılması, torpaq məsələləri və digər problemlərin həllinə köməklik göstərilməsini xahiş ediblər. Bütün bunlar nəzərə alınaraq qaldırılan məsələlərin həll olunması üçün rayon İcra Hakimiyyətinin Başçısı yerindəcə aidiyyatı təşkilatların rəhbərlərinə göstəriş və tapşırıqlarını verdi.
Kənd sakinləri öz çıxışlarında Azərbaycan Respublikasının Prezidenti cənab İlham Əliyevin daxili və xarici siyasətini yekdilliklə bəyəndiklərini, eləcə də Respublikamızda diqqəti cəlb edən sosial-iqtisadi inkişafdan böyük fəxr duyduqlarını dərin razılıq hissi ilə bildirmiş, dövlət başçımızın Kürdəmir rayonuna göstərdiyi xüsusi diqqət və qayğını yüksək qiymətləndiriblər. Kənd sakinləri Azərbaycan Respublikasının Prezidentinin Sərəncamına əsasən inşa edilən Pirili – Muradxan - Sor Sor avtomobil yolunun tikintisinə görə ölkə rəhbərinə minnətdarlıqlarını bildiriblər.
Rayon İcra Hakimiyyətinin Başçısı Ceyhun Cəfərov görüşdə qaldırılan təkliflərin tezliklə həyata keçiriləcəyini əminliklə qeyd edərək, cari məsələlərin həlli üçün müvafiq strukturların rəhbərlərinə konkret tapşırıqlarını verdi.
