Ümummilli Lider Heydər Əliyevin anadan olmasının 90 illik yubileyi münasibətilə tədbirlər davam edir
Kürdəmir rayon İcra Hakimiyyəti YAP Kürdəmir rayon təşkilatı ilə birgə 30 aprel 2013-cü il tarixdə Ulu Öndər Heydər Əliyevin anadan olmasının 90 illik yubileyi münasibətilə “Heydər Əliyev və Azərbaycanda gənclər siyasəti” mövzusunda elmi-praktiki konfrans keçirdi.
Konfrans iştirakçıları ilk öncə Ulu Öndərin adını daşıyan parka gələrək Ümummilli Lider Heydər Əliyevin abidəsini ziyarət etmiş, abidənin önünə gül-çiçək dəstələri düzmüşlər.
Sonra elmi-parktiki konfrans “Gənclər Evi” nin akt zalında öz işinə başladı.
Konfransın işində YAP Kürdəmir rayon təşkilatının sədri Ağali Kərimli iştirak etdi.
Tədbiri giriş sözü ilə açan YAP Kürdəmir rayon təşkilatının sədri Ağali Kərimli bütün varlığı ilə Azərbaycana və azərbaycançılığa xidmət edən dahi rəhbərimiz – dövlətçilik tariximizə xilaskar kimi daxil olmuş və respublikamıza rəhbərlik etdiyi bütün dövrlərdə bu missiyanı çox böyük uğurla yerinə yetirmiş Ulu Öndərimiz Heydər Əliyevin keçdiyi həyat yolundan söz açdı.O, vurğulamışdır ki, Ulu Öndər Heydər Əliyev Azərbaycana rəhbərlik etdiyi bütün dövrlər ərzində, həmişə xalqımızın milli maraqlarını dəqiq müəyyən etmiş, ictimai, siyasi, iqtisadi, mədəni və digər sahələrlə yanaşı gənclərlə aparılan işi daim önə çəkmişdir. Natiq qeyd etmişdir ki, Ulu Öndərin Azərbaycan gəncliyinə göstərdiyi qayğı bu gün ölkə rəhbəri, partiyamızın sədri cənab İlham Əliyev tərəfindən davam etdirilir. Ağali Kərimli gəncləri qarşıdan gələn Prezident seçkilərində aktiv olmağa, onları müstəqil dövlətimizin işıqlı gələcəyi, xalqımızın hərtərəfli tərəqqisi naminə Ulu Öndər ideyalarını böyük uğurla həyata keçirən cənab İlham Əliyevin ətrafında sıx birləşməyə çağırdı.
Giriş sözündən sonra tədbir iştirakçıları Ulu Öndər Heydər Əliyevə həsr olunmuş sənədli filmə tamaşa etmişlər.
Elmi-praktik konfransda YAP rayon təşkilatı Gənclər Birliyinin sədri Namiq Tarverdiyev “Heydər Əliyev müstəqil Azərbaycan dövlətinin banisidir”, YAP rayon təşkilatının gənclərlə iş üzrə təlimatçısı, rayon təşkilatının şura üzvü Məhəmməd Heydərli “Heydər Əliyev Azərbaycan gəncliyinin böyük dostu və himayədarıdır”, Gənclər və İdman İdarəsinin rəsi Zaur Həsənov “Heydər Əliyev və dövlət gənclər siyasəti”, Əhalinin Sosial Müdafiəsi Mərkəzinin aparıcı məsləhətçisi Elşad Qurbanov “Heydər Əliyev və müasir gənclik” mövzularında çıxışlar etmişlər.Onlar vurğulamışlar ki, Ulu Öndər Heydər Əliyevin cəmiyyət və dövlət quruculuğu prosesində gənclərlə iş sahəsinə xüsusi diqqət yetirməsi, Azərbaycan gənclərinin müstəqil dövlətimizin tərəqqisi naminə təşkilatlanması, səfərbər edilməsi baxımından mühüm əhəmiyyət kəsb edir. Natiqlər bu gün ölkə rəhbəri cənab Prezident İlham Əliyevin bu siyasəti çox böyük uğurla davam etdirməsinin müstəqil və müasir Azərbaycanın işıqlı gələcəyinin qarantına çevrilməsinə səbəb olduğunu vurğulamışlar. Onlar gənclərimizin bu sabitlikdən, əmin-amanlıqdan bəhrələnərək ölkəmizin uğurlu gələcəyi naminə çalışacaqlarını qeyd etmişlər.
Sonda Ağali Kərimli tədbir iştirakçılarını və onların simasında rayonun bütün gənclərini Ulu Öndər Heydər Əliyevin anadan olmasının 90 illik yubileyi münasibətilə təbrik edərək rayon gənclərini yubiley tədbirlərində fəal iştirak etməyə dəvət etdi.
