Kürdəmirdə “Ölkəmizi tanıyaq” tur aksiyada iştirak edəcək məktəblilərin yola salınmasına həsr olunmuş tədbir keçirilib

Noyabrın 10-da rayonun Heydər Əliyev Mərkəzində Kürdəmir rayonunun orta ümumtəhsil məktəblərinin 9-11-ci sinif şagirdlərinin “Ölkəmizi tanıyaq” devizi altında Vətənimizin müxtəlif bölgələrinə təşkil olunan maarifləndirici tur-aksiyasına yola salınması münasibətilə tədbir keçirilib.
Tədbirdə Kürdəmir Rayon İcra Hakimiyyətinin Başçısı Ceyhun Cəfərov, rayonun  hüquq  mühafizə  orqanlarının,  idarə,  müəssisə  və  təşkilatlarının  rəhbərləri,   ağsaqqallar və ziyalılar, məktəb direktorları, valideynlər, veteranlar və ictimaiyyət nümayəndələri və tur aksiyasının iştirakçıları iştirak edirdilər.
Tədbirdən əvvəl mərasim iştirakçıları Ümummilli Lider Heydər Əliyevin abidəsinin önünə gül dəstəsi qoyaraq xatirəsini ehtiramla yad etdilər.
Tədbirdə çıxış edən şəhər 1 saylı tam orta məktəbin müəllimi Zahirə Əsgərova, tur-aksiya iştirakçısı, şəhər 1 saylı tam orta məktəbin şagirdi Elçin Kərimov, valideyn Zülfiyyə Mahmudova  “Ölkəmizi tanıyaq” devizi altında Vətənimizin müxtəlif bölgələrinə təşkil olunan maarifləndirici tur-aksiyasının əhəmiyyətindən danışaraq Azərbaycan Respublikasının Prezidenti cənab İlham Əliyevə minnətdarlıqlarını bildiriblər.
Kürdəmir Rayon İcra Hakimiyyətinin Başçısı Ceyhun Cəfərov tədbirdə çıxış edərək bildirib ki, artıq dördüncü ildir ki, Azərbaycanın orta ümumtəhsil məktəblərinin 9-11-ci sinif şagirdlərinin iştiraki ilə “Ölkəmizi tanıyaq” devizi altında Vətənimizin müxtəlif bölgələrinə maarifləndirici tur-aksiyaları təşkil olunur. Dövlətimizin başçısı İlham Əliyevin tövsiyəsinə əsasən Prezident Administrasiyasının təşkilatçılığı ilə keçirilən tur-aksiyalar artıq  gözəl ənənə halı alıb. “Ölkəmizi tanıyaq” layihəsinin əsas məqsədi şagirdləri ölkəmizin müxtəlif bölgələrinin müasir həyatı, tarixi, mədəni irsi, adət-ənənələri, özünəməxsus xüsusiyyətləri, Ümummilli Lider Heydər Əliyevin qurub-yaratdığı müstəqil Azərbaycanın nailiyyətləri ilə yaxından tanış etmək, Prezident İlham Əliyevin qətiyyəti və iradəsi ilə respublikamızın dinamik sosial-iqtisadi inkişafı, gündən-günə abadlaşan şəhər və rayonlarımızın yeniləşən siması barədə gənclərdə əyani təsəvvür yaratmaqdır. Ötən müddətdə ildə iki dəfə olmaqla 7 istiqamət üzrə (Bakı şəhəri, Naxçıvan MR, Gəncə-Şəmkir-Göygöl, Şamaxı-İsmayıllı-Qəbələ-Şəki-Zaqatala, Quba-Qusar-Xaçmaz, Lənkəran-Masallı-Lerik-Astara, Naftalan-Ağcabədi-Ağdam-Bərdə-Füzuli-Tərtər) 7 tur-aksiya təşkil edilmişdir. Ölkəmizin bütün bölgələrinin əhatə olunduğu bu tur-aksiyalarda, ümumilikdə, 13 min 648 məktəbli iştirak etmişdir. Bu il noyabrın 11-14 və 16-19 tarixlərini əhatə edəcək növbəti 8-ci tur-aksiyada isə 4 istiqamət üzrə 76 şəhər və rayondan, o cümlədən məcburi köçkün rayonlarından, ümumilikdə, 3213 nəfər iştirak edəcək. Bununla da, “Ölkəmizi tanıyaq” tur-aksiyalarında iştirak edən məktəblilərin sayı 17 minə yaxın olacaqdır. Kürdəmir rayonunda  İsmayıllı - Qəbələ - Şəki, Gəncə- Göygöl – Şəmkir, Qəbələ - Şəki - Zaqatala olmaqla 7 istiqamət üzrə hər dəfə 40 uşağın iştirakı ilə 280 şagird iştirak edib, sabah ekskursiyaya gedən uşaqlarla birlikdə onların sayı 320 olacaqdır.  “Ölkəmizi tanıyaq” maarifləndirici tur-aksiyasının şagirdlərimizin dünyagörüşünün formalaşmasında, bilik səviyyələrinin artmasında, ölkəmizi daha yaxından tanımasında çox böyük əhəmiyyəti vardır. Ümummilli lider Heydər Əliyevin qurub-yaratdığı müstəqil Azərbaycanın bu günki  nailiyyətlərini, Ölkə Prezident Cənab İlham Əliyevin qətiyyəti və iradəsi ilə respublikamızın dinamik sosial-iqtisadi inkişafı, gündən-günə abadlaşan şəhər və rayonlarımızın yeniləşən simasıni görmək yetişən gənc nəslin vətənə məhəbbət ruhunda tərbiyə olunmasında çox böyük rol oynayır. Ulu öndər Heydər Əliyevin düşünülmüş siyasətinin məhsulu olan Müstəqil Azərbaycan dövləti ,onun uğurlu daxili və xarici siyasəti bu gün  Möhtərəm cənab  Prezidentimiz İlham Əliyev tərəfindən uğurla davam etdirilir. Azərbaycanın son dövrlərdə həyata keçirdiyi irimiqyaslı kontraktlar,çoxlarının həyata keçəcəyinə şübhə ilə baxdığı layihələr , idman oyunlarının yüksək səviyyədə keçirilməsi Azərbaycanın daim artan gücünü ,qüdrətini bütün dünyaya bir daha göstərdı. Möhtərəm cənab  Prezidentimiz İlham Əliyev və Birinci vitse-prezident Mehriban xanım Əliyeva təhsilin, səhiyyənin, mədəniyyətin, idmanın inkişafını daim diqqətdə saxlayır, ekologiyanın qorunmasına diqqət yetirir, hər il ölkə vətəndaşlarının pulsuz müayinəyə cəlb olunması, şəhid və əlil ailələrinə, qaçqın və məcburi köçkünlərə, aztəminatlı ailələrə, internat və qocalar evlərində yaşayanlara dövlət qayğısı  göstərirlər. “Ölkəmizi tanıyaq” maarifləndirici tur-aksiyasında iştirak edən şagirdlər ölkəmizin ayrı-ayrı bölgələri haqqında zəngin məlumata yiyələnəcəklər. Gəncə-Göygöl-Şəmkir  bölgəsinə səfər edən məktəblilər genişmiqyaslı quruculuq işləri, maddi-mənəvi irsin qorunması və bərpası istiqamətində həyata keçirilən önəmli sosial layihələr, həmçinin 200 il əvvəl salınan alman məskənləri ilə tanış olacaqlar.Onu da qeyd etmək lazımdır ki, Cənubi Qafqaz regionunda alman məskənlərinin salınmasının 200 illiyinin tamam olur, bu hadisənin Azərbaycanın multikultural ənənələrə malik çoxəsrlik tolerantlıq məkanı kimi təbliğində böyük əhəmiyyətini nəzərə alan  Prezident  İlham  Əliyev  həmin  əlamətdar tarixin qeyd olunması ilə bağlı Sərəncam imzalayıb və sərəncama uyğun tədbirlər keçiriləcəkdir.Ekskursiyada məktəblilər əvvəlcə Azərbaycanın ikinci ən böyük şəhəri – Gəncənin sosial-iqtisadi və mədəni həyatı ilə ətraflı tanış olacaqlar. Tur-aksiyanın iştirakçıları Gəncənin yeni xəritəsində əksini tapan müasir sənaye müəssisələri, turizm və sosial obyektləri, yaraşıqlı prospektləri, park və xiyabanları ilə tanış olacaq, şəhərin tarixi məkanlarına - Cavadxan məqbərəsi, Cümə məscidi, Şah Abbas məscidi, Çökək hamam, Xan bağı, Qədim Qala divarları, “İmamzadə” kompleksi, Comərd Qəssab türbəsi, Nizami Gəncəvi məqbərəsinə ekskursiya edəcək, Şəmkir rayonunda “Orta əsr Şəmkir şəhəri”, “Abidələr” parkı, Alman kilsəsi, Göygöl rayonunda Alman kirxası, sonuncu alman Viktor Klaynın ev-muzeyi ilə tanış olacaq, Hacıkənd qəsəbəsinə və Göygöl Milli Parkına səfər edəcəklər. Son dövrlərdə Azərbaycanın iqtisadiyyatında qeyri-neft sektorunun, xüsusilə aqrar sahənin çox böyük payı vardər. İndi ölkədə qeyri-neft sənayesinin inkişafına xüsusi diqqət yetirilir. Bu inkişafın konturları Strateji Yol xəritələrində əksini tapıb. Bu baxımdan Lənkəran, Astara, Masallı rayonları ölkə iqtisadiyyatında mühüm yerlərdən birini tutur. Bu bölgə sitrus bağları, çay və çəltik plantasiyaları, səfalı məkanları ilə tanınır, tarixi yerləri, özünəməxsus adət-ənənələri ilə seçilir. Bu il sentyabrın 3-də Lənkəranda çay, çəltik və sitrus meyvələri istehsalının inkişafı məsələlərinə dair respublika müşavirəsində Prezident İlham Əliyevin verdiyi tapşırıq və tövsiyələr, bu sahələrin dirçəldilməsi ilə əlaqədar imzalanan Sərəncam ölkə iqtisadiyyatının şaxələndirilməsi baxımından mühüm rol oynayır. Bu sahələrin dirçəldilməsi üçün mövcud potensialın qorunub saxlanılması, həmçinin çəltikçilik, sitrus meyvəçilik, çayçılıq və cins heyvandarlıq təsərrüfatlarının, çəltik və çay emalı müəssisələrinin, sitrus meyvələrinin saxlanılması üçün logistik mərkəzin yaradılması nəzərdə tutulur. Lənkəran-Astara-Masallı istiqaməti üzrə səfər edəcək məktəblilər bütün bunlarla, eyni zamanda, tarixi məkanlarla, yeni tikililərlə yaxından tanış ola biləcəklər. Lənkəranda “Qoşa qala” qapıları, Həzi Aslanovun ev-muzeyi, Dairəvi qala, Mayak binası, Hirkan Milli Parkı, Xanbulan gölü, çay plantasiyaları, sitrus meyvə bağları, Astarada şəhər bulvarı, “Yanar bulaq” və “Astaraçay” çay fabriki, Masallıda Tarix-Diyarşünaslıq Muzeyi, Uşaq İncəsənət Məktəbi, Dövlət Rəmzləri Muzeyi, “ASAN həyat” kompleksi, Viləşçay su anbarına ekskursiya şagirdlərin yaddaşında silinməz iz qoyacaqdır.Ölkə iqtisadiyyatında önəmli rola malik olan bölgələrimizdən biri də Qəbələ-Şəki-Zaqatala zonasıdır .Sabah bizim məktəblilər Qəbələ-Şəki-Zaqatala istiqamətində yola düşürlər.Mən  onlara uğurlu yol arzulayıram və qeyd etmək istəyirəm ki, bu istiqamət üzrə səfər edəcək şagirdlərimiz müasir turizm infrastrukturuna malik olan Qəbələdə “Tufandağ” Xizəkçilik Kompleksinə, qədimliyi ilə fərqlənən Çuxur Qəbələ Tarix və Mədəniyyət Qoruğuna, udilərin yaşadığı Nic kəndinə baş çəkəcəklər. Zəngin Şəki mətbəxi, Dövlət Tarix-Memarlıq Qoruğu, Şəki Xan sarayı, Yuxarı Karvansaray, Aşağı Karvansaray, Cümə məscidi və Kiş kəndindəki qədim Alban məbədi, “Marxal” müalicəvi istirahət kompleksi tur-aksiya iştirakçılarında zəngin təəssürat oyadacaq. Bu rayonlarımız da digər bölgələrimiz kimi, həm turizm iqtisadiyyatı, multikulturalizm ənənələri, həm də tarixi məkanları ilə tanınır. Eyni zamanda, bu bölgədə barama, tütün və fındıqçılıq da geniş inkişaf etmişdir. Prezident İlham Əliyevin sədrliyi ilə bu il avqustun 4-də Qaxda keçirilən barama, tütün və fındıq istehsalının inkişafı məsələlərinə dair respublika müşavirəsi bu baxımdan ölkəmizin iqtisadi həyatında mühüm hadisəyə çevrilmişdir. Xüsusi qeyd etmək lazımdır ki, respublikamızda ənənəvi sahələrdən olan baramaçılığın inkişaf etdirilməsi və ipəkçiliyin müasir infrastrukturunun yaradılması istiqamətində həyata keçirilən zəruri tədbirlər ölkəmizin şimal-qərb bölgəsinin ən iri sənaye müəssisələrindən olan “Şəki-İpək” ASC-nin fəaliyyətini əhəmiyyətli dərəcədə canlandırıb. Şəkidə yeni tut bağları salınır, baramaçılığın, ipəkçiliyin ənənələri yenidən bərpa olunur, “Şəki-İpək” kombinatında geniş yenidənqurma işləri həyata keçirilir. Bir sözlə, qədim ipəkçilik sənəti ilə məşhur olan Şəkidə indi bu sahənin inkişafına xüsusi diqqət yetirilir. Şəki həm də öz mətbəxi, adət-ənənələri və tarixi məkanlar ilə fərqlənir. Məktəblilərimiz vaxtilə gülçülük, tütünçülük və fındıq bağları ilə məşhur olan Zaqatalaya da gedəcəklər. Sadalanan ənənəvi və gəlirli aqrar sahələrin inkişaf etdirilməsi rayonun qarşısında duran əsas hədəflərdəndir. Şagirdlər müasir fındıq emalı müəssisəsi, tütünçülük təsərrüfatları ilə tanış olacaq, Tarix-Mədəniyyət Qoruğuna baş çəkəcək, Dədə Qorqud Meydanını gəzəcəklər. Qədim və müasir Zaqatala haqqında məlumatlar tur-aksiya iştirakçılarının böyük marağına səbəb olacaq və şagirdlərimiz zəngin məlumatlarla və çox büyük əhval-ruhiyə ilə qayıdacaqlar. Aksiyanın hər iki mərhələsində məktəblilərin asudə vaxtlarında “Nə? Harada? Nə vaxt?” intellektual oyunları təşkil olunacaq, qaliblərə xatirə hədiyyələri veriləcək, onlar üçün teatr tamaşaları və konsert proqramları təşkil ediləcəkdir ki,bu da ayri-ayri bölgələrin məktəbliləri arasında dostluq münasibətlərinin yaranmasına gətirib çıxaracaqdır. Azərbaycan artıq dünya miqyasında idman ölkəsi kimi tanınır. Nüfuzlu beynəlxalq turnirlərdə, idman yarışlarında, dünya və Avropa çempionatlarında, eləcə də olimpiadalarda yüksək yerlər tutan azərbaycanlı idmançılar öz nailiyyətləri ilə bunu təsdiqləyiblər. Ölkəmizin uğurla ev sahibliyi etdiyi nüfuzlu idman tədbirləri sırasında 2015-ci ildə Bakıda və Mingəçevirdə keçirilən I Avropa Oyunlarını, 2017-ci ildə paytaxtımızda təşkil olunan IV İslam Həmrəyliyi Oyunlarını, eləcə də “Formula-1” yarışlarını misal göstərmək olar. Bütün bunlara Azərbaycanda idmana göstərilən dövlət qayğısı sayəsində nail olunub. Bu istiqamətdə həyata keçirilən siyasət Azərbaycanda idmanın populyarlaşdırılması, yeniyetmə və gənclər arasında təbliği üzərində qurulub. Eyni zamanda, ölkəmiz üçün yeni olan idman növləri də gənclər arasında yayılmaqdadır. Qəbələdəki “Tufandağ” Xizəkçilik Kompleksi, Qubadakı qolf meydançası, “Şahdağ” turizm mərkəzindəki xizək məktəbi həm turizmin inkişafı, həm də yeni idman növlərinin geniş yayılması baxımından mühüm əhəmiyyət kəsb edir.Quba-Qusar-Xaçmaz bölgəsində də son illər aqrar sahənin, emal müəssisələrinin, xüsusən də turizm sənayesinin inkişafı istiqamətində çox böyük işlər görülüb. Bu bölgə həm də tarixi məkanları ilə tanınır. Aksiya iştirakçıları bütün bunlar barədə məlumat alacaq, eyni zamanda, Quba Soyqırımı Memorial Kompleksində erməni vəhşiliyinin əyani şahidi olacaqlar. Azərbaycanın bu dilbər guşəsi multikultural ənənələri ilə də seçilir. Bölgədə müxtəlif xalqların nümayəndələri əsrlərdən bəri dinc şəraitdə yaşayır, həm öz mədəniyyətlərini, həm də Azərbaycan xalqının mədəniyyətini zənginləşdirirlər. Yəhudilərin sıx məskunlaşdığı Qırmızı qəsəbəyə, Quba xalçaçılıq emalatxanasına, Cümə məscidinə, Tağlı körpüyə, Xınalıq yolundakı şəlaləyə, qolf meydançasına ekskursiyalar məktəblilərin yaddaşında silinməz izlər qoyacaq. Azərbaycanın şimal bölgəsi iqtisadiyyatı ilə bərabər, turizmin inkişafı üçün  də cəlbedici məkandır. Son illərdə bu bölgədə turizm infrastrukturunun yaradılması istiqamətində  mühüm addımlar atılıb. Qusar rayonunda “Şahdağ” Turizm Mərkəzinə gələn turistlərin sayı ilbəil artır. Bu mərkəzi Azərbaycanın turizm brendi hesab etmək olar. Şahdağ təbiətin bütün fəsillərində öz gözəlliyi ilə fərqlənir. Məktəblilər bu mərkəzə səfərlə yanaşı, Qusar şəhərinin görməli yerlərini gəzəcək, Həzrə kəndindəki “Şeyx Cüneyd” türbəsi ilə tanış olacaqlar. Bu istiqamətdə tur-aksiyanın növbəti məkanı Xaçmaz rayonu olacaq. Xaçmaz şəhərindəki “Şəxsiyyətlər muzeyi"nə, Çənlibel parkına, xalça muzeyinə ekskursiyalar, rayonun sosial-iqtisadi inkişafı ilə bağlı görülən işlər məktəblilərdə böyük maraq doğuracaq.“Ölkəmizi tanıyaq” maarifləndirici tur-aksiyanın proqramı təkcə bölgələrin sosial-iqtisadi, tarixi-mədəni həyatı ilə tanışlıqla bitmir. Tur zamanı şagirdlərdə vətənpərvərlik hisslərini inkişaf etdirmək məqsədilə həmçinin Ermənistan-Azərbaycan, Dağlıq Qarabağ münaqişəsi, o cümlədən 1994-cü il mayın 12-dən qüvvədə olan atəşkəsə məhəl qoymayan Ermənistan silahlı qüvvələrinin mövqelərimizə daim atəş açması, dinc əhalini, yaşayış yerlərini gülləboran etməsi barədə ətraflı məlumat verilməlidir. Belə ki, düşmən növbəti dəfə təxribata əl ataraq 2016-cı il aprel ayının 2-də yenidən mövqelərimizə hücuma keçib, bir neçə dinc sakini qətlə yetirib, Azərbaycan Ordusu bu hücumun qarşısını almaq üçün əks-hücumla bir sıra məntəqələri və yüksəklikləri azad edib. Aprel müharibəsi bir daha sübut etdi ki, Azərbaycan əsgəri, xalqımız nəinki müharibəyə tam hazırdır, hətta onu qısa vaxtda qalibiyyətlə başa çatdırmaq imkanındadır.    2016-cı il aprel ayında torpaqlarımızın bir hissəsinin azad olunmasında Ali baş komandan Ölkə Prezidenti cənab İlham Əliyevin çox böyük siyasi iradəsi, qüvvəsi durur. Onun söylədiyi bu sözlər uşaqdan böyüyə hamının dilində əzbərə döndü.”Əgər erməni əsgəri ölmək istəmirsə, Azərbaycan torpaqlarından rədd olsun.” Hörmətli Prezidentimiz cənab İlham Əliyev dəfələrlə qeyd etdiyi kimi ,Azərbaycan heç vaxt öz torpaqlarında ikinci erməni dövlətinin yaradılmasına imkan verməyəcəkdir.Rayonumuzun övladları da aprel hadisələrində öz rəşadətlərini göstərdilər.İki şəhidimiz oldu . Əbubəkr və Tural başda olmaqla  qoy şəhidlərimizin ruhu şad olsun.Artıq onların  düşmən tapdağından azad etdiyi  torpaqlarda  güllər bitir ,cənnətməkan salınır.Cəbrayıl rayonunun Cocuqmərcanlı kəndində ölkə prezidentinin tapşırığına əsasən genişmiqyaslı işlərə başlanılıb.Qısa müddət ərzində Cocuqmərcanlıda gözəl bir qəsəbə salındı:geniş asvalt yolları,yaşayiş binaları,məktəbi və digər sosial obyektləri olan bu qəsəbə düşmənə çox böyük psixoloji zərbə olmaqla,   ”Böyük Qayıdışın “başlanğıcı oldu. 20 ildən artıqdır ki, bizim torpaqlarımızin bir hissəsi ermənilərdə olduğu halda,onlar bu ərazilərdə demək olar ki,heç bir iş görməyiblər,amma bizim torpaqlarımızın bir hissəsini aldığımız bir ildir,qururuq ,yaradırıq ,çünki bilirik ki, bu torpaqlar bizimdir .Artiq ermənilər də çox gözəl başa düşürlər ki,Qarabağ torpaqları onların deyil,bu gün Cocuqmərcanlıda görülən işlər bir gün Şuşada,Xankəndində görüləcəkdir!  Bu barədə məlumatlar məktəblilərin vətənpərvərlik ruhunun yüksəldilməsi üçün çox vacibdir. Ekskursiya zamanı məktəblilərin Azərbaycanın təşəbbüsü ilə reallaşan bir sıra qlobal layihələr barədə də məlumatlandırılması vacibdir. Şagirdlərin diqqətinə çatdırılmalıdır ki, ulu öndərimiz Heydər Əliyevin rəhbərliyi ilə 1994-cü il sentyabrın 20-də “Əsrin müqaviləsi”nin imzalanması Azərbaycanın yeni neft strategiyasının başlanğıcı hesab olunursa, bu strategiyanı uğurla davam etdirən Prezident İlham Əliyevin iştirakı ilə bu il sentyabrın 14-də Bakıda Heydər Əliyev Mərkəzində imzalanan “Azəri”, “Çıraq” və “Günəşli” yataqlarının birgə işlənməsinə dair saziş isə “Yeni əsrin müqaviləsi” adlanmaqla kontraktın vaxtının uzadılması Tap Tanap layihələrinin uğurla icra olunması dövlətimizin bu günki uğurlarındandır nailiyyətlərindəndir. İmzalanma mərasimində bir sıra nüfuzlu dövlətlərin, dünyanın nəhəng neft şirkətlərinin rəhbər şəxslərinin iştirakı da buna sübutdur. Beləliklə, yeni müqaviləyə görə, “Azəri, Çıraq və Günəşli” yataqlarınından 2050-ci ilədək çıxarılacaq neftdən gələn gəlirlər ölkəmizin sosial-iqtisadi inkişafını daha da sürətləndirəcək. Yeni müqavilə həm də xarici tərəfdaş şirkətlərin Azərbaycan iqtisadiyyatına olan inamını göstərir. Son illər Azərbaycanda nəqliyyat infrastrukturuna böyük investisiya yatırılır. Bu il oktyabrın 30-da açılışı olan və qitələri birləşdirən, dəmir İpək yolu adlandırılan Bakı-Tbilisi-Qars dəmir yolu ilə Londondan Pekinədək qatarlar hərəkət edəcək, yük və sərnişin daşınacaqdır. Bu layihənin təkcə iqtisadi deyil, həm də geostrateji əhəmiyyəti var. Ekskursiya zamanı şagirdlərin  bütün bu layihələr barədə məlumatlandırılmasının da çox böyük əhəmiyyəti vardır . Şagirdlərə beynəlxalq aləmdə, xüsusən də şərq ölkələrində  münaqişələrin baş verməsinə baxmayaraq, ölkəmizdə ölkə başçımızın uğurlu siyasəti nəticəsində siyasi-sabitliyin qorunub saxlanması, Azərbaycanın dünyəvi, tolerant, multikultural dövlət olması, gənclərin dini-xurafata meyllənməməsi, onların intellektual səviyyəsinin yüksəldilməsi barədə məlumatların verilməsi  də çox vacibdir.