Muradxan-Pirili kanalının inşası davam etdirilir
Kürdəmir rayonunun Muradxan-Pirili massivində bu ildən əkin dövriyyəsinə qatılan 4500 hektar torpaq sahəsini suvarma suyu ilə təmin etmək üçün tədbirlər görülür.
Bu məqsədlə hazırlanan layihə-smeta sənədlərinə əsasən, ərazini su ilə təmin edəcək Muradxan kanalının su ötürmə qabiliyyəti 2 kub saniyədən 3,5 kub saniyəyə qədər artırılacaq. Hazırda işlər podratçı şirkət olan “Xəzər inşaat E” MMC tərəfindən görülür. İndiyədək mövcud Muradxan beton kanalının sağ və sol sahilləri torpaq əlavə edilməklə 90 sm-ə qədər qaldırılıb, Kür çayı sahilində inşa edilən Çərtəyəz nasos stansiyasının beton bünövrəsi və divarları tökülüb, kərpic izolyasiya qatının verilməsinə başlanılıb. Muradxan beton kanalının davamı olaraq 4,5 km məsafədə kanalın torpaq yatağı tökülüb, dib beton hissəsinin verilməsinə başlanılıb.
İşlərin gələn ilin birinci yarısında başa çatdırılması nəzərdə tutulub.
