Kürdəmirdə 20 Yanvar faciəsinin 26-cı ildönümü ilə əlaqədar anım tədbiri keçirilib
Yanvarın 19-da Yeni Azərbaycan Partiyası Kürdəmir rayon təşkilatının Qadınlar Şurası və Kürdəmir rayon İcra Hakimiyyətinin birgə təşkilatçılığı ilə 20 Yanvar faciəsinin 26-cı ildönümü ilə əlaqədar tədbir keçirib.
YAP rayon təşkilatının qərargahında keçirilən tədbirdə YAP rayon təşkilatının Qadınlar Şurasının üzvləri, fəal qadınlar, idarə, müəssisə və təşkilatlarda çalışan, YAP üzvü olan qadınlar iştirak ediblər. Sonra tədbir YAP rayon təşkilatının akt zalında öz işinə başladı.
Əvvəlcə mərasim iştirakçıları Azərbaycan xalqının milli müstəqilliyi uğrunda qurban getmiş şəhidlərin əziz xatirələrin bir dəqiqəlik sükutla yad ediblər.
Tədbiri giriş sözü ilə YAP rayon təşkilatı Qadınlar Şurasının sədri Sevda Hacıyeva açıb. O, bildirib ki, Azərbaycan xalqı 1990-cı ilin qanlı yanvarını həm faciə, həm də qəhrəmanlıq səhifəsi kimi yaşadı. 20 Yanvar hadisələri xalqımızın 1988-ci ildə başlanan milli azadlıq hərəkatının kuliminasiya nöqtəsi idi. SSRİ-nin ali dövlət hakimiyyəti orqanları Azərbaycan xalqının suveren hüquqlarını qorumaq sahəsində konstitusiya öhdəliklərini yerinə yetirmədi. Bu da 1988-ci ildə respublikanın ərazi bütövlüyünün müdafiəsi uğrunda kütləvi xalq hərəkatının yaranmasına gətirib çıxardı. Digər tərəfdən Azərbaycanın o vaxtkı siyasi rəhbərliyinin tam çaşqınlığı, xalqla əlaqəsinin itməsi, müstəqilliyinin olmaması onun iflasını və hakimiyyətsizliyini labüd etmişdi. Beləliklə, yanvarın 19-dan 20–nə keçən gecə Azərbaycanın o vaxtki satqın rəhbərliyinin istəyi və SSRİ rəhbərliyinin əmri ilə ölkəmizdə kommunist rejimini saxlamaq məqsədilə Bakıya 15000 nəfərlik ordu yeridildi. Sovet qoşunlarının təcavüzü nəticəsində Bakıda 147 mülki vətəndaş öldürülmüş, 700 nəfərdən çox insan yaralanmış, 321 nəfər isə itkin düşmüşdür. Öldürülənlər arasında 5 millətin nümayəndələri, 20-dən çox qadın və uşaq var idi.
Tədbirdə rayon təşkilatının idarə heyəti üzvü, şəhər 6 saylı tam orta məktəbin direktoru Elmira Şıxəliyeva, Qadınlar Şurasının idarə heyəti üzvü, Heydər Əliyev Mərkəzinin direktoru Dürriyə Seyidova, Şəhər 1 saylı tam orta məktəbin müəllimi Mehriban Məmmədova, şəhər 3 saylı tam orta məktəbin müəllimi Əsbət Musayeva çıxış edərək bildirirlər ki, 20 Yanvar hadisəsi xalqımızın iradəsini qıra bilmədi. Lakin onların bu çirkin niyyətləri baş tutmadı. Əksinə, bu qanlı faciə Azərbaycanın müstəqil milli dövlət qurmaq arzusunu daha da gücləndirdi və bu müqəddəs yolda daha da inamla addımladı. 1990-cı ilin yanvar qırğını nə qədər facəli olsa da, Azərbaycan xalqının iradəsini, milli azadlıq uğrunda mübarizə əzmini qıra bilmədi. Həmin müdhiş gecədə həlak olan vətən övladları Azərbaycanın tarixinə parlaq səhifə yazdılar, xalqın milli azadlığı, müstəqilliyi üçün yol açdılar.Bu gün xalqımız demokratik dövlətdə firavan, azad, xoşbəxt həyat sürürlər.Bütün bunları biz canlarını torpaqlarımızın qorunması və bizim gələcək firavan həyatımız uğrunda fəda edən oğullarımıza borcluyuq.
Sonda Kürdəmir rayon İcra Hakimiyyəti Başçısının müavini Vəsilə Əsgərli çıxış edərək qeyd edib ki, 20 Yanvar Azərbaycan xalqının təkcə faciə günü yox, həm də tariximizin qanla yazılmış şərəfli səhifəsidir. 20 Yanvar şəhidləri millətin qeyrət rəmzidir. Bu qeyrəti, vüqarı həmişə uca tutmaq bizim borcumuzdur. 20 Yanvar tarixində baş verən hadisələr xalqımızın milli qürur hissini daha da formalaşdırdı. İndi biz müstəqilliyimizi, azadlığımızı qorumalı və daha möhkəmləndirməliyik.Budur bizim şəhidlər qarşısında müqəddəs borcumuz. 20 Yanvar hadisələrinin mühüm nəticələrindən biri də o idi ki, bu hadisə sovet imperiyasının dağılmasında ciddi rol oynadı.
Ulu Öndər Heydər Əliyev yanvarın 21-də Moskvada Azərbaycanın daimi nümayəndəliyinə gələrək, sübut elədi ki, xalq sahibsiz deyil, Heydər Əliyev kimi rəhbəri var. Rəhbər nəyə qadir olduğunu 20 Yanvarda sübut etdi. Azərbaycan xalqının Ümummilli Liderinin ölkə rəhbərliyinə qayıdışından sonra Ulu Öndər vətənimizin azadlığı uğrunda canlarından keçən vətəndaşlarımızın xatirəsini əbədiləşdirilməsi məqsədilə əməli tədbirlər həyata keçirdi.Ölkəmizin suverenliyi uğrunda canlarından keçən oğul və qızlarımızın əziz xatirəsinə ən layiqli töhfə olan “Əbədi məşhəl” abidəsi belə yaradıldı.
Bu gün möhtərəm Prezidentimiz cənab İlham Əliyev Heydər Əliyev siyasi kursunun layiqli davamçısı kimi böyük öndərimizin yolunu davam etdirir. Сənab İlham Əliyev 1990-cı ilin 20 Yanvar şəhidlərinin xatirəsinin əbədiləşdirilməsi, adlarının uca tutulması, onların ailələrinin, övladlarının sosial müdafiəsinin gücləndirilməsi üçün son illər mühüm işlər görür. Prezidentin sərəncamları ilə 20 Yanvar faciəsinin ildönümü hər il respublikanın hər yerində qeyd olunur.Şəhid ailələrinə dövlət qayğısı artırılır.
