Kürdəmirdə “Ölümü ömür seçənlər" kitabının təqdimat mərasimi keçirilib
Sentyabrın 24-də rayonun Heydər Əliyev Mərkəzində AMEA N.Gəncəvi adına Milli Azərbaycan Ədəbiyyatı Muzeyinin Aran Regional filialının müdiri, filologiya üzrə fəlsəfə doktoru Yaqut Bahadurqızının 44 günlük Vətən müharibəsində qəhrəmancasına şəhid olmuş 39 kürdəmirli Vətən fədaisinin qısa, lakin şərəfli həyatından, döyüş yolundan bəhs edən 721 səhifəlik oçerklərin yer aldığı "Ölümü ömür seçənlər" adlı kitabın təqdimat mərasimi keçirilib.
Mərasimdə Kürdəmir rayon İcra Hakimiyyətinin başçısınin vəzifəsini müvəqqəti icra edən, başçının müavini Ağali Kərimli,Şəhid ailələri və qazilər,rayon ictimaiyyətinin nümayəndələri və qonaqlar iştirak edirdilər.
Tədbir Dövlət himninin səsləndirilməsi ilə başlandı.
Tədbirdə öncə ölkəmizin ərazi bütövlüyü uğrunda şəhidlik zirvəsinə ucalan qəhrəman oğullarımızın xatirəsi bir dəqiqəlik sükutla yad edildi, ruhlarına dualar oxundu.
Təqdimat mərasimini giriş sözü ilə açan Kürdəmir rayon İcra Hakimiyyətinin başçısınin vəzifəsini müvəqqəti icra edən, başçının müavini Ağali Kərimli çıxış edərək Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında 44 gün ərzində əldə olunan möhtəşəm Qələbənin müstəqillik tariximizin ən böyük zəfəri olduğunu qeyd etdi. Eyni zamanda o, çıxışında sentyabrın 27-dən başlayaraq cəbhə xəttində işğalçı Ermənistan ordusunun təxribatlarına cavab verən şanlı Azərbaycan Ordusunun qısa zamanda Qarabağ uğrunda başladığımız haqq savaşını Qələbə ilə başa vurmasını, 44 gün davam edən İkinci Vətən müharibəsində qəhrəman oğullarımızın düşmənə sarsıdıcı zərbələr endirərək, onları 27 il işğal altında saxladıqları torpaqlarımızdan qovmasını vurğuladı.
Çıxış edənlər vurğulayıblar ki, Vətən müharibəsində də Birinci Qarabağ savaşında olduğu kimi – Ali Baş Komandanın səfərbərlik haqqında Sərəncamından sonra Kürdəmir rayonunun yüzlərlə vətənpərvər gənci cəbhəyə yola düşərək, ön cəbhədə əsl şüsaət göstərmiş, yağı düşmənə qarşı mərdliklə döyüşmüşlər. Vətən müharibəsində əldə etdiyimiz Qələbənin təmin olunmasında zabitlər, həqiqi hərbi xidməti yerinə yetirənlər, səfərbərlik çağırışı ilə Milli Ordumuza çağırılanlar və könüllü cəbhəyə gedən yüzlərlə kürdəmirlilər əsl qəhrəmanlıq göstərmişlər. Onlar erməni işğalçılarının neçə-neçə canlı qüvvəsini məhv edərək, onlarla döyüş texnikasını ələ keçirmiş, torpaqlarımızın azad edilməsində əsl şücaət göstərərək yeni şanlı tarix yazmışlar.
Tədbirə monitor vasitəsilə qoşulan kitabın redaktoru, tarix elmləri doktoru, professor Habil Məmmədov çıxışında Qəhrəman şəhidlərimizin adları əbədiləşdirilməsinin, büstlərinin qoyulmasının, adlarına bulaqlar açılmasının, şəhid məzarlarının ziyarətgaha çevrilməsi,hər biri bir qəhrəmanlıq dastanı olan şəhidlərin həyat tarixçəsinin qan yaddaşına köçürülməsinin Şəhidlər qarşısında vətəndaşlıq borcu olmasından söz açaraq, istedadlı qələm sahibi Yaqut xanımın oxuculara təqdim olunan kitabının şəhidlərin unudulmaması və gənc nəslin hərbi vətənpərvərlik ruhunda tərbiyə edilməsində çox faydalı olacağını vurğuladı.
Təqdimat mərasiminə Xarkov şəhərindən monitor vasitəsilə qoşularaq münasibətini bildirən Dövlət İdarəetmə Elmləri doktoru, professor, “Ukrayna-Azərbaycan Dostluq Cəmiyyəti”nin fəxri üzvü Azad Ömərov qeyd etdi ki, “Ölümü ömür seçənlər” kitabının Vətən yanğısını söndürməyə gedən oğullardan bəhs edən kitabın oxunaqlı olmağına səbəb müəllifin gördüklərinə, eşitdiklərinə, oxuduqlarına, igid şəhidlərimizin valideynləri, müəllimləri, qohum-əqrabalarının söylədiklərinə şərik olan yazıçı təxəyyülünün məhsuludır. Müəlifin bəzən bədiləşdirdiyi səhnələrin də öz koloriti ilə kitabı daha həyacanla oxumağa vadar edir.Bununla yanaşı, müəllifin təqdim etdiyi bu kitab yeniyetmələrə, gənclərə vətənpərvərlik ruhu aşılayır və gələcəkdə qəhrəmanlıq, vətənpərvərlik, anaya sevgi, saf məhəbbət, dosta sədaqət və s. haqqında yazılacaq əsərlərdə bir məlumat mənbəyi kimi istifadə oluna bilər.
Rayonun din xadimləri Füzuli Cəfərov, Aqil Əliyev, şəhid baş leytenat Fərrux Hüseynovun atası Baxış Hüseynov, şəhid gizir Cəmil Həşimlinin anası Simuzər Bağıyeva, şəhid Ziyadxan Əliyevin anası Müşgünaz Həziyeva, Kürdəmir Regional Mədəniyyət İdarəsinin rəsisi Faiq Xudanlı, Vətən müharibəsi qazisi Fariz Əzizov, dil-ədəbiyyat müəllimi Şəfəq Ağayeva çıxış edərək bildirdilər ki, Kürdəmir şəhidləri haqqında yazılan “Ölümü ömür seçənlər” kitabı onların xatirələrinin əbədiləşdirilməsi uğrunda atılan təqdirəlayiq addım olmasını və hərbi vətənpərvərlik ruhunun aşılanması üçün vacibliyini vurğuladılar və müəllifə qısa zaman ərzində belə dəyərli kitabı ərsəyə gətirdiyinə görə şəhid ailələri adından minnətdarlıqlarını bildirdilər.
Tədbirdə şəhidlərimizə həsr olunan foto slayd nümayiş edildi.
Məktəblilər “Ölümü ömür seçənlər” kitabından hazırladıqları kompazisiyanı tədbir iştirakçılarına təqdim etdilər.
Təqdimat mərasiminin sonunda kitabının müəllifi Yaqut Bahadurqızı onun əməyinə göstərilən diqqətdən məmnunluğunu ifadə etdi və tədbirin iştirakçılarına öz minnətdarlığını bildirdi. “Ölümü ömür seçənlər” kitabı şəhid ailələrinə hədiyyə edildi.
