Kürdəmirdə Polis işçilərinin peşə bayramı qeyd olundu
Kürdəmir rayonunda 2013-cü il 02 iyul tarixdə Azərbaycan polisinin 95 illik yubileyi münasibətilə geniş tədbir keçirildi.
Tədbir iştirakçıları ilk öncə Ulu Öndər Heydər Əliyevin abidəsini ziyarət etmiş, abidənin önünə tər gül-çiçək dəstələri düzmüş, ona hörmət və ehtiramlarını ifadə etmişlər.
Tədbirin rəsmi hissəsi Kürdəmir rayon İcra Hakimiyyətinin Başçısı İrşad Əliyevin iştirakı ilə açılışı olmuş, hər cür müasir avadanlıqlarla təchiz edilmiş yeni inzibati binanın 100 nəfərlik akt zalında davam etdirildi.
Kürdəmir rayon Polis Şöbəsinin rəisi, polis polkovniki Oktay Məmmədov “Azərbaycan polisinin yaranmasının 95-ci ildönümü haqqında“ məruzə edərək Azərbaycan polisinin, o cümlədən Kürdəmir rayon Polis Şöbəsinin və şöbənin əməkdaşlarının keçdiyi şərəfli yoldan danışdı. O, qeyd etdi ki, son vaxtlar ölkəmizdə, o cümlədən Kürdəmirdə də cinayətkarlığa qarşı mübarizə işi gücləndirilib. Rayon Polis Şöbəsi üçün yeni inzibati binanın istifadəyə verilməsi dövlətimizin başçısı cənab İlham Əliyevin polis işçilərinə olan diqqət və qayğısının bariz nümunəsi olduğunu bildirdi.
Rayon İcra Hakimiyyətinin başçısı cənab İrşad Əliyev yığıncaqda çıxış edərək iştirakçıları salamlamış, 02 iyul Polis İşçiləri Günü münasibətilə bütün polis işçilərini təbrik etmişdir. İcra başçısı əmin olduğunu bildirib ki, polis işçiləri onlara yaradılan şəraitdən səmərəli istifadə edərək dövlətimizin və cənab Prezidentimizin onlara göstərdiyi diqqət və qayğıya cavab olaraq qanunların aliliyinin təmin olunması, hüquqazidd əməllərin qarşısının alınması və ictimai asayişin mühafizəsinin təmin olunmasında bundan sonra fəaliyyətlərini daha da təkmilləşdirəcəklər.
Sonda Kürdəmir rayon İcra Hakimiyyətinin Başçısı tərəfindən bir qrup polis işçisinə Fəxri Fərman və qiymətli hədiyyələr verildi.