Kürdəmirdə Yeni Azərbaycan Partiyasının yaranmasının 26-cı ildönümünə həsr olunmuş tədbir keçirilib
Yeni Azərbaycan Partiyasının yaranmasının 26-cı ildönümü münasibətilə noyabrın 21-də YAP Kürdəmir rayon təşkilatının qərargahında tədbir keçirilib.
Tədbirdə YAP rayon təşkilatının idarə heyəti və şura üzvləri, partiyanın veteran üzvləri, ərazi ilk partiya təşkilat sədrləri, partiya fəalları, ictimaiyyətin nümayəndələri iştirak ediblər.
Öncə tədbir iştirakçıları rayon təşkilatının qərargahında yerləşən Ulu Öndər
Heydər Əliyevin büstü önünə gül-çiçək dəstələri düzüblər.
Tədbirdə YAP Kürdəmir rayon təşkilatının sədri Ağali Kərimli tədbir iştirakçılarını partiyanın yaranmasının 26-cı ildönümü münasibətilə təbrik edərək məruzə ilə çıxış etmişdir. O, Yeni Azərbaycan Partiyasının yarandığı tarixi şəraitdən, keçdiyi şərəfli yoldan, partiyanın yaradıcısı Ulu Öndər Heydər Əliyevin xilaskarlıq missiyasından və partiyamızın cəmiyyətdə aparıcı rolundan danışmışdır. Ağali Kərimli qeyd edib ki, Ulu Öndər Heydər Əliyev 1993-cü ilin iyununda –son dərəcə mürəkkəb, ağır dövrdə xalqın təkidli tələbi ilə ölkəyə rəhbərlik məsuliyyətini üzərinə götürməsəydi, bügünkü müstəqil, qüdrətli, sürətlə inkişaf edən, regionun lider dövlətinə çevrilən Azərbaycandan danışmaq mümkün olmazdı. Olduqca çətin bir şəraitdə yaranmış bu partiyanın çox qısa müddətdə əsl siyasi qüvvə kimi formalaşması, minlərlə əqidəli insanın onun sıralarında birləşməsi bu gün bir daha Heydər Əliyev fenomeninin, dühasının qüdrətindən xəbər verir. Bu gün müstəqil Azərbaycan Respublikası, möhkəm özülə söykənən dövlətçiliyimiz ölkə Prezidenti, Yeni Azərbaycan Partiyasının Sədri cənab İlham Əliyevin rəhbərliyi ilə uğurlu gələcəyə doğru inamla addımlayır.
Tədbirdə Yeni Azərbaycan Partiyasının veteran üzvləri Qasım Hüseynov, Mehrab Abdurahmanov, rayon təşkilatının Qadınlar Şurasının sədri Sevda Hacıyeva, Rayon təşkilatının Qadınlar şurasının idarə heyəti üzvü, Tərəqqi medallı, Əmək veteranı Sevil Osmanova , Rayon təşkilatının idarə heyəti üzvü, ilk təşkilat sədri Elmira Şıxəliyeva, ilk təşkilat sədri Hamiz Musayev, Rayon təşkilatınını şura üzvü Abduləziz Hüseynov, Rayon təşkilatının idarə heyəti üzvü, Gənclər Birliyinin sədr müavini Elnur Məmmədli çıxış etmişlər. Natiqlər bildiriblər ki, Yeni Azərbaycan Partiyasının Azərbaycan dövlətçiliyinin inkişafında xidmətləri danılmazdır və partiyamızın bu istiqamətdə gördüyü böyük işlər hər bir vətəndaşımız tərəfindən yüksək qiymətləndirilir. Azərbaycanın 26 il ərzində keçdiyi yol Yeni Azərbaycan Partiyasının şərəf tarixi, şərəf salnaməsidir. Onlar Ümummilli Lider Heydər Əliyevin və onun ən layiqli davamçısı Prezident İlham Əliyevin rəhbərliyi ilə ölkə həyatının bütün sahələrində aparılan ardıcıl və köklü islahatların, yürüdülən daxili və xarici siyasətin xalqımızın rifah halının daha da yaxşılaşmasına, dövlətçiliyimizi daha da möhkəmləndirilməsinə zəmin yaratdığını diqqətə çatdırıblar.
