Kürdəmirin çağrışçı gəncləri hərbi xidmətə yollanmışlar

Aprelin 12-də rayonun Heydər Əliyev Parkında Kürdəmirin çağrışçı gənclərinin  təntənəli  surətdə hərbi xidmətə yola salınması mərasimi keçirilib.
Kürdəmir Rayon  İcra  Hakimiyyətinin Başçısı Ceyhun Cəfərov, hüquq-mühafizə orqanlarının rəhbərləri,  rayon  ictimaiyyətinin  nümayəndələri,  ziyalılar,  ağsaqqallar və gənclər,  valideynlər  çağrışçı gəncləri  hərbi  xidmətə  yola  salmağa gəlmişdilər. Şən və oynaq musiqi sədaları ətrafa yayılmışdı.
Mərasimin açılışı zamanı Azərbaycanın Dövlət himni əzəmətlə səslənmişdir.
Tədbiri giriş sözü ilə Səfərbərlik və Hərbi Xidmətə Çağrış üzrə Dövlət Xidmətinin Kürdəmir  rayon şöbəsinin rəisi, polkovnik  Həbib Əliyev açaraq  Azərbaycan ordusunun keçdiyi tarixi yol haqqında geniş məruzə etmişdir.
Valideynlər  adından  çıxış  edən Qorxmaz Mahmudov, Ağsaqqallar Şurasının sədri Ayyət Nəsirov, Qarabağ  müharibəsi  veteranı  Zahid Səlimov və başqaları çıxış   edərək  əsgəri  xidmətə  yola  düşən çagrışçılara  xeyir -dualarını vermiş, onlara  öz məsləhət və tövsiyyələrini bildirmişlər.
Mərasimdə  çağrışçılar  adından   Şahsuvar Əliyev çıxış  edərək , ana vətəni laiqincə qoruyacaqlarını, nümunəvi  əsgər olacaqlarını , doğma  yurdun, el-obanın valideynlərinin  onlara olan inamını  daim  yüksək  səviyyədə  doğruldacaqlarını böyük inam hissi ilə ifadə etmişdir.
Tədbirdə  çıxış  edən  Kürdəmir rayon İcra Hakimiyyətinin Başçısı Ceyhun Cəfərov bildirib ki, bu gün biz bura vətənimiz üçün  çox əhəmiyyətli  və şərəfli məqsəd   olan çağrışçıların  hərbi  xidmətə  yola salma mərasiminə  toplaşmışıq. Bu gündən etibarən siz çağrışçılar ordu sıralarına daxil olub əsgər adını daşıyacaqsınız. Bu adı daşımaq və öz doğma vətəninə xidmət etmək hər bir Azərbaycan oğlunun müqəddəs və şərəfli borcudur.Bu əlamətdar gün sizin həyatınızda uzun müddət xatırlanacaqdır. Bu gün sizin taleyinizdə  mühüm bir mərhələnin  bünövrəsi  qoyulur – siz ordu sıralarına  yollanmaqla  Vətənimizin  müdafiə qabiliyyətinin möhkəmləndirilməsinə dəyərli töhfələr verirsiniz. Sizə bu  şərəfli  işinizdə uğurlar  arzulayıram. Arzu  edirəm ki, sağ  gedib  salamat qayıdasız  .Siz əsgərlərlə yanaşı  biz hamımız  Cənab Ali Baş Komandanımız İlham Əlliyevin ətrafında sıx birləşərək dövlət müstəqilliyimizi qorumalı, möhkəmləndirilməli və dönməz etməliyik. Elə etməliyik ki, Azərbaycan həmişə inkişaf etsin, qüdrətlənsin. Ümummilli Liderimiz  Heydər Əliyev Azərbaycanın hərbi  ənənələrinin  qorunmasına  önəm  verərək  hakimiyyətinin  bütün dövrlərində  gənclərimizin hərb işinə marağının gücləndirilməsinə ciddi diqqət yetirmişdir. O, qeyd  edirdi ki, hərbi vəzifə daşımaq  gənclərimizin  ən  müqqəddəs vəzifələrindən biri olmalıdır. Silahlı  Qüvvələrin  hər bir hərbi  qulluqçusu “ Vətənə ,  xalqa , dövlətə  xidmət bizim ömrümüzün mənasıdır” – devizini dərk etməli ,  bu amalla yaşamalı və  vicdanla xidmət etməlidir. Rayonumuzun övladları da 2016-cı ilin Aprel döyüşlərində öz rəşadətlərini göstərdilər. İki şəhidimiz oldu: İsmayılov Əbubəkr Vüqar oğlu və Qurbanov Tural Gülşad oğlu... Əbubəkr və Tural başda olmaqla  qoy şəhidlərimizin ruhu şad olsun. Artıq onların  düşmən tapdağından azad etdiyi  torpaqlarda  güllər bitir , cənnətməkan salınır. Cəbrayıl rayonunun Cocuqmərcanlı kəndində Ölkə Prezidentinin tapşırığına əsasən genişmiqyaslı işlər görülüb. Qısa müddət ərzində Cocuqmərcanlıda gözəl bir qəsəbə salındı, geniş asvalt yolları, yaşayiş binaları, və digər sosial obyektləri olan bu qəsəbə düşmənə çox böyük psixoloji zərbə oldu. Artiq ermənilər də çox gözəl başa düşürlər ki, Qarabağ  torpaqları onların deyil, bu gün Cocuqmərcanlıda görülən işlər bir gün Şuşada, Xankəndində görüləcək!
Sonra  çağrışçılar  məşhur “Azərbaycan “mahnısının sədaları altında Azərbaycan  bayrağını öpərək , onun  altından  keçib hərbi xidmətə yola düşmüşlər.
Tədbir rayon incəsənət ustalarının verdiyi maraqlı konsertlə başa çatmışdır.