Şriftin ölçüsü :

Saytın rəngi :

Kürdəmirdə ilk dəfə soya əkilib

14 oktyabr 2017 | 16:00

Kürdəmirdə  heyvandarlığın  inkişafı  və  mal-qaranın keyfiyyətli yem ilə təminatının yaxşılaşdırılması üçün ilk dəfə olaraq rayonun Karrar və Pirili  kəndlərində  200  hektar  sahəyə soya  toxumu  səpilib və fermerlər bol məhsul yetişdirməyə nail olublar. Yaxın günlərdə  rayonda soya  məhsulunun toplanılmasına başlanılacaq. Bitkilərə vaxtında  aqrotexniki qaydada qulluq edildiyindən  sahələrdə  bol məhsul  yetişib. Əslində, fermerlər rayonda ilk dəfə soya bitkisi əkilərkən məhsuldarlığın belə olacağını gözləmirdilər.
Bu bitki digərləri ilə müqayisədə xeyli gəlirlidir. Bu il soya sahələrinin hər hektarından 20-25 sentner məhsul gözlənilir. Məhsulun satışında fermerlər üçün heç bir problem olmayacaq. Satış zamanı 1 ton soya məhsuluna 1000 manatdan bir qədər artıq pul ödəniləcək ki, bu da fermerlər üçün olduqca sərfəlidir. Necə deyərlər, fermerlər digər məhsullarla müqayisədə soya bitkisindən ikiqat gəlir əldə edə biləcəklər. Odur ki, rayonda gələn il 400 hektar sahədə soya bitkisinin əkilməsi gözlənilir.
Qeyd edək ki, dövlət  tərəfindən  alınan  subsidiyalar hesabına kənd təsərrüfatı məhsullarının əkini sahəsini ildən-ilə genişləndirən kürdəmirli fermerlər 2018-ci ildə soya istehsalını iki dəfə artırmağı qarşıya məqsəd qoyublar.

Keçidlər